Jump to Content

MA sa Nua-Ghaeilge

CUR SÍOS AR AN gCLÁR

Is í Ollscoil na Gaillimhe an ceannródaí náisiúnta ó thaobh Léann na Gaeilge. Tá saineolas ag foireann Roinn na Gaeilge ar gach tréimhse de chuid na Gaeilge, ón luath-thréimhse go dtí an teanga chomhaimseartha. Tá áiseanna taighde den scoth ag an ollscoil agus rinneadh infheistíocht mhór i gcartlanna na hollscoile, rud a thugann buntáiste ar leith don mhac léinn ar mian leis/léi taighde a dhéanamh sna bailiúcháin Ghaeilge atá againn. Tá an Ghaeltacht ar leac an dorais againn agus tá teacht ag na mic léinn ar áiseanna foghlama agus taighde den scoth sna campais Ghaeltachta atá ag an ollscoil i gConamara agus i nGaoth Dobhair.

Agus an cúrsa seo críochnaithe agat, beidh tú in ann:

Feidhmiú go cruinn ag leibhéal gairmiúil agus acadúil trí mheán na Gaeilge sa scríbhneoireacht agus sa labhairt;
Anailís chriticiúil a dhéanamh ar réimsí éagsúla de Léann comhaimseartha na Gaeilge lena n-áirítear: an Chritic Liteartha, an Chritic Chultúir agus Shóisialta, an Traidisiún Béil, an tSochtheangeolaíocht, Traidisiún na Lámhscríbhinní Déanacha.
Cur chuige idirdhisciplíneach a léiriú san anailís chriticiúil ar réimsí éagsúla de Léann na Gaeilge;
Do chuid taighde agus anailíse a chur i láthair go cumasach agus go héifeachtach ag an leibhéal cuí acadúil;
Taighde nuálach, neamhspleách a dhéanamh ar shainábhar de do rogha féin agus an taighde sin a léiriú i bhfoirm tráchtais.

Baineann na torthaí foghlama céanna leis an Dioplóma Iarchéime seachas nach bhfuil taighde neamhspleách i bhfoirm tráchtais le déanamh.

RÉAMHRIACHTANAIS

Ní mór d’iarrthóirí céim dara honóracha 2.2 (ag leibhéal a 8 den Chreat Náisiúnta Cáilíochtaí) a bheith acu, le 2.1 sa Ghaeilge.
Glacfar le hiarratais ó iarrthóirí a bhfuil céim 2.1 nó a comhionann acu in ábhar eile, ach caithfidh siad Stiúrthóir Acadúil an chúrsa a shásamh go bhfuil cumas dóthanach acu sa Ghaeilge chun tabhairt faoin gcúrsa, trí scrúdú agus/nó agallamh a dhéanamh.
Is féidir le hiarrthóirí nach bhfuil na cáilíochtaí acadúla cuí acu, ach a bhfuil cúig bliana de thaithí chuí ghairmiúil acu, iarratas a dhéanamh faoi chóras na hOllscoile d’Aitheantas don Réamhfhoghlaim (RPL).

LEAGAN AMACH AN CHÚRSA

Tá cúig mhodúl éigeantacha le déanamh ag gach mac léinn lánaimseartha (luach 70 ECTS) don chúrsa MA.

Teanga na Nua-Ghaeilge (10 ECTS)

Modhanna Taighde (10 ECTS)

Teanga, Coimhlint agus Cumhacht (10 ECTS)
Teoiricí Liteartha agus Cultúir (10 ECTS)
Tráchtas (30 ECTS)

Is gá do mhic léinn dhá cheann de na cúrsaí roghnacha seo a dhéanamh freisin (luach 20 ECTS). Ní bhíonn gach cúrsa ar fáil gach bliain.

An Inscne agus an Ghnéasúlacht (5 ECTS)
An Dúchas agus an Duine (10 ECTS)

An Athbheochan (5 ECTS)

I gcás an Dioplóma Iarchéime sa Nua-Ghaeilge, tá na modúil éigeantacha mhúinte thuas (seachas an Tráchtas) le déanamh ag gach mac léinn (luach 40 ECTS) agus dhá cheann/trí cinn de na cúrsaí roghnacha (luach 20 ECTS).